捽"數"大會

尋日朝大老闆捉哂我地班 Team Head 同 Managers 入房，逐 Team 問D Tax Deadline Cases 搞成點， 有咩問題。其實次次deadline 都會有呢d捽"數"大會，務求大家都可以係deadline 前幫d客報哂稅，一來廢事d客比稅局罰錢果陣係度嘈 (d客呢...無論關唔關我地事都嘈...就算明明佢成10月尾先比d數我地audit，邊夠時間...到頭來遲左上稅局佢都係嘈返我地 =_=!)，二來快快手做完可以快d開單收錢。

會中有位同事問錯左一個問題...就咁燒焦...大老闆好明顯心情不佳，一聽到佢呢個係presentation 上犯左少少錯誤既問題，即刻借題發揮，連環發炮，又話做人要有logical thinking，問問題要有sense 云云...一輪咀丙左十零分鐘(平時大老闆講個電話都好快收線，十零分鐘對佢黎講已經係一段好長既speech)。

好彩我地個team既deadline cases已經開哂job，除左report比佢聽有個客d數又亂咁入之外，都冇咩野講。

講開呢個亂咁入數既客，其實好多係大陸開廠既港商，都因為中港稅務既問題而係會計上嘗試做手腳，有時我地見到d所謂"高明"既稅務安排真係得啖笑，純粹係想呢邊又慳稅，果邊又慳稅，但又唔諗下，大拿拿成千萬direct cost一個數咁篤落黎，你真係當稅局d評稅主任白痴架咩...

係呢度都趁機會同做生意既"你地"講聲，今年稅局真係捉得好緊，一定唔可以遲報稅之餘，亦都避免有馬腳露出黎比稅局捉到，否則一開file，先查7年數，再追究你有冇逃稅+罰錢甚至比佢告，真係大檸樂...